Homenaxe a Eloy Palacio nel tercer aniversariu del incendiu de la cai Uría

El subinspector de Bomberos d’Uviéu Alejandro Vallina asegura que "too sigue igual"

Mañana cúmplense tres años del incendiu que quemó n’Uviéu los edificios d’Uría 58 y Melquiades Álvarez 25.

El subinspector del cuerpu de Bomberos d’Uviéu, Alejandro Vallina, denuncia nun escritu que la falta d’agua foi’l factor determinante del espardimientu del fueu.

Asegura que güei’l centru de la ciudá sigue ensin tar preparáu p’afrontar un incendiu como’l d’abril de 2016, porque la rede d’agua nun tien los puntos necesarios d’abastecimientu. Critica que l’Ayuntamientu nun ficiere nada dende entós.

Vallina afirma que nun corrixeron les deficiencies alcontraes y llamenta que nel xuiciu nun se tuvieren en cuenta los factores de riesgu que se dieron, como que los bomberos nun contaron con relevos trabayando munches hores a alta temperatura.

El sucesu recuérdase, sobre manera, porque nél perdió la vida’l Bomberu d’Uviéu Eloy Palacio, mientres trataba d’apagar el fueu que quemó dafechu los dos edificios.

Homenaxe al bomberu fináu nos incendios: Eloy Palacio

Güei, viéspora d’esi aniversariu, compañeros del fináu de toa España tán recordándolu nun actu nel Auditoriu Príncipe Felipe d’Uviéu.

Nesi actu fízose entrega a la familia de dineru, que los propios bomberos fueron a recaudar nos últimos meses p’ayudalos económicamente.

Dende entós, los bomberos de toa España axuntáronse y trabayen p’algamar una llei nacional que garantice que se siguen los mesmos protocolos d’actuación en tol país. Falamos colos que trabayen nella y con Cuni, el bomberu mancáu naquel accidente que lo camudó too.

Pasaron tres años, pero nel recuerdu de los uvieínos siguen mui presentes les imáxenes de los dos edificios calcinaos dafechu en plenu centru de la ciudá; y les de los dos bomberos d’Uviéu atrapaos polos escombros dempués d’esbarrumbase l’inmueble.

Eloy Palacio finó nel actu. El so compañeru Juan Carlos Fernández 'Cuni', salió solu. Diz que volvió a nacer, y dende entós, lleva nel cascu un dibuxu que recuerda al so compañeru Eloy.

Nel xuiciu, sentenció que l’accidente foi imprudencia temeraria porque nun quedó probao que se-yos ordenare apagar el fueu dende dientro.

Una situación inxusta pa tolos sos compañeros que provocó la xuntanza nacional d’esti gremiu, que llucha dende entós por una llei nacional que garantice la seguridá de les actuaciones y de los propios bomberos.

Hebo recuerdos y homenaxes a Eloy Palacio dende que finare. Un monumentu y placa nel cuartel de Rubín, y una estatua na contornada fecha por un compañeru.

Pa que naide escaeza a esti profesional que finó trabayando pa garantizar la seguridá de los demás.