Hunosa va aprovechar l'agua del pozu Barredo pa producir hidróxenu verde

Díaz asegura que l'hidróxenu va ser parte de la solución del modelu enerxéticu asturianu

La directora xeneral d'Enerxía, Minería y Reactivación del Principáu, Belarmina Díaz, afirmó esti vienres que “l'hidróxenu va sumase a les alternatives enerxétiques de futuru n'Asturies”, anque conseñó que “nun va ser la solución al modelu enerxéticu, va ser una parte d'esa solución”.

Díaz, que participó na inauguración d'unes xornaes sobre les tecnoloxíes del hidróxenu nel ámbitu empresarial, destacó que'l Principáu tien ventayes competitives nel ámbitu del hidróxenu al cuntar con consumidores industriales y infraestructures eléctriques, enerxétiques, de gas y industriales que van dexar xenerar hidróxenu na rexón.

Nesta xornada, "Hidróxenu, fonte d'enerxía alternativa y de futuru", celebrada n'El Musel, na que tamién participaron el presidentes de la Cámara de Comerciu de Xixón, Félix Baragaño, y de l'Autoridá Portuaria de Xixón, Laureano Lourido, espunxéronse les potencialidaes y proyectos nos qu'anguaño ta trabayando'l Gobiernu d'Asturies en collaboración con empreses privaes y entidaes espertes nel sector.

Hunosa tien previsto instalar plaques fotovoltaiques aprovechando la redoma del pozu Barredo y una escombrera pa producir hidróxenu verde aprovechando l'agua de mina.

Col agua de mina del pozu Barredo de Mieres, Hunosa quier llegar a producir hasta 45 MW d'hidróxenu verde de manera esperimental. Un proyectu xunto a Alsa al que se suma otru con Rioglass que pasen pola instalación de plantes fotovoltaiques. N'Idesa va suministrar pieces pal montaxe de la planta d'hidróxenu verde más grande d'Europa.

El CSIC pidió a les empreses que se xuban al enclín del hidróxenu.