Industria pide diálogu p'algamar l'alcuerdu menos traumáticu en Duro Felguera

Fernández reconoz que l'Executivu nun ta d'alcuerdu coles midíes anunciaes pola empresa

El conseyeru d’Industria, Trabayu y Promoción Económica, Enrique Fernández, pidió güei a empresa y sindicatos que falen pa "buscar l’alcuerdu menos traumáticu" pa Duro Felguera, dempués de l’anuncia fecha pola compañía de bienes d’equipu de qu’aplicará un espediente d’estinción de trabayu en cuatro de les sos sociedaes.

En rempuesta a una entruga d’IX nel plenu celebráu güei na Xunta Xeneral del Principáu, el titular d’Industria reconoció que l’Executivu asturianu nun ta d’alcuerdu coles midíes plantegaes por Duro Felguera, pero tamién alvirtió qu’un escenariu peor sedría que la empresa llegare a un concursu d’acreedores.

"Hai un escenariu malu que nun aprobamos de nenguna manera, como son les regulaciones de trabayu, pero hai otru entá peor: qu’hubiere un concursu d’acreedores colo que se perderíen tolos trabayos y una empresa tractora, y l’Estáu nun recuperaría los fondos públicos", avisó Fernández.