Instituciones penitenciaries tresllada fuera d'Asturies a unu de los Sandulache

L'otru hermanu ta n'aislamientu na cárcel tres agredir a otru reclusu

TPA Noticies adelanta la última hora del casu Sandulache. Unu de los hermanos, Cristian, lleva cuasi 20 díes nel módulu d'aislamientu na cárcel d'Asturies tres agredir a otru reclusu, Marian Meauca, que foi condergáu nel mesmu procedimientu que los hermanos.

Sebastián Sandulache, pela so parte, foi treslladáu a la prisión d'A Lama, en Pontevedra.

Los hermanos compartieron banquín por trata de seres humanos con Marian Meauca, que lluz collarín, porque enantes d'esi xuiciu denunció otra paliza d'un grupu allegáu a la cla.

Los tres fueron condergaos pola Audiencia y taben internaos na cárcel asturiana.
Foi ellí, onde'l pasáu 1 de febreru socedió l'agresión. Esi vienres, a les 19:00, Marian Meauca quedara col so lletráu pa presenta-y a otru reclusu rumanu que quería los sos servicios. Lo que Meauca desconocía ye que lu engañaren.

Según fontes penitenciaries, esi otru reclusu, baxó a la parte de los llocutorios con Cristian Sandulache. Nun dio’l so nome al funcionariu, namás-y dixo que diba facer de traductor y dambos entraron nel pasiellu onde esperen les comunicaciones colos abogaos.

Pocos minutos dempués, Meauca entraba nel mesmu pasiellu, y la puerta cerróse tres d’él.
Nesi momentu, y nos malapenes tres minutos que, aseguren, tardaron n'intervenir los funcionarios, dambos solmenáben-y una brutal paliza que-y dexaba una brecha na cabeza, un güeyu incháu y ensin cuasi poder caminar.

Meauca foi treslladáu al Hospital Central d'Asturies y recupérase yá na enfermería de la prisión.