Itvasa asoleya los procesos de selección pa contratar a 44 nuevos trabayadores

Les midíes de refuerzu, que darán a la plantiya mayor estabilidá, aprobáronse enantes de la convocatoria de fuelga

La empresa pública Inspección Técnica de Vehículos Asturies (Itvasa) asoleyó na canal de trabayu de la so web dellos procesos de selección pa contratar indefinidamente a 44 nuevos trabayadores, que reforzarán la plantiya y amenorgarán al mínimu la temporalidá.

Itvasa entamó’l vienres un procesu de selección pa contratar indefinidamente a 35 inspectores d’estaciones de la inspección técnica de vehículos, mientres que la selmana anterior asoleyó los anuncios pa inxertar a ocho xestores de veceros y a un técnicu de contratación.

En total, la compañía sumará 44 nuevos trabayos indefiníos, según informó esti llunes el Gobiernu asturianu.

Con estes contrataciones, la empresa amenorgará la eventualidá de la so plantiya al 0,8%, mui per baxo del tope del 8% afitáu como oxetivu na resolución de 22 de marzu de 2018 de la Secretaría d’Estáu de Función Pública y afitáu nel alcuerdu ente’l gobiernu y los sindicatos pa la meyora del trabayu públicu y les condiciones de trabayu.

Estes midíes de refuerzu, que darán a la plantiya mayor estabilidá, aprobáronse enantes de la convocatoria de fuelga n’Itvasa.

El comunicáu apunta que los sindicatos taben informaos sobre los procesos de selección previstos pola empresa.