Josefina Fernández, una de les últimes modistes d’A Veiga y una peculiar baillarina

Participó en programas de baille con un moñecu como compañeru, que lleva cosíu a los zapatos

La vida de Josefina Fernández nun tendría sentíu enagora lloñe de les cintes métriques y de les sos máquines de coser. Tamos énte una de les últimes modistes d’A Veiga.

So padre foi un renomáu xastre na zona. De mano en San Tiso d’Abres y llueu na capital del conceyu veigueñu.

De pequeña yá xugaba con tela, y yá garraba’l preste a un oficiu que tamién desendolcare so madre.

Los vistíos de novia siempres fueron la so especialidá. Fizo munchos de los que se vistieron n’A Veiga y na contornada.

Pero munchos na zona conócenla por otra de les sos pasiones, el baille. Siempres foi una amante de los guateques, adoraba baillar, pero tenía un problema, al so home nun-y gustaba.

¿Y qué fizo? Pues diseñar y facer un moñecu de baille, unu a tamañu real que va cosíu a los zapatos y cumple les funciones perfectamente.

Nun daba la talla y tuvo que desfacelu y facer unu nuevu. Esi mesmu, anque con munchos traxes, ye’l que lleva de fiesta en fiesta. Tuvo yá en dellos programes de televisión amosando’l so arte. Y, a diferencia de lo que podamos pensar, baillar con un moñecu nun ye nada fácil.

Güei ye’l so fíu’l que lleva’l negociu familiar, pero ella niégase a quedar en casa. Caldía va a la tienda pa tar cerca de les sos máquines de coser.

La moda foi la so gran pasión, pero reconoz que pudo llegar más lloñe si la dexaren.

Un enfotu que nun perdió col pasu los años. Josefina ye toa una artista, cola aguya, y nes pistes de baille.