Juan Cigales asegura que dende'l sindicatu llegaron a dici-y "namás tienes que pagar y chitón"

Hunosa corrobora'l pagu de cheques nominativos a Villa

L'ex-contable del SOMA-UXT Juan Cigales declaró esta mañana na tercer sesión de la vista oral del xuiciu que se sigue escontra l'ex-secretariu xeneral José Ángel Fernández Villa, qu'él personalmente nun tenía capacidá decisoria dalguna nes cuentes y que ésti dicía-y: "namás tienes que pagar y chitón".

En declaración como testigu, Cigales afirmó qu'él "siempres tenía que preguntar" y inclusive rellató qu'una vegada que dixera a Villa que taba "aforfugáu" de trabayu, él respondió-y que "si nun taba contentu, que lo dixera, porque tenía una cola de xente d'ehí a La Felguera".

Cigales refugó que tuviera rellación con un posible desfase de les cuentes.

"Yo siempres tenía que preguntar. Fai esto o fai lo otro, dicíenme”, aseguró, refugando asina la responsabilidá que descargaben sobre él tanto Villa como'l co-acusáu Pedro Castillejo, na sesión del pasáu xueves.

L'ex contable especificó qu'él entamó a llevar la contabilidá del SOMA-UXT a partir del añu 2001 y que la única indicación que recibió yera la de pagar tres comprobar les factures que-y apurríen, fueren "de José Ángel o de cualesquier otru miembru. Yera un control d'ingresos y gastos, más que de la contabilidá", manifestó.

Juan Cigales reconoció que llevaba personalmente "les cuestiones doméstiques de Villa, como él les llama".

"Yo diba al despachu y apurría-y dacuando un sobre, dacuando una bolsa. Había gastos de gasolina, prensa. Había a farta. Yo xuntábalo too y rellenaba una fueya de cálculu y roblaba él. Yo pagaba", repitió.

El testigu ratificó que los únicos pagos que, en siendo adelantaos pol sindicatu reintegró Villa, correspondíen al pagu del viaxe de los sos fíos a Madrid cuando recibió la medaya d'oru, amás d'un ordenador que mercara a la fía; pagos que se fixeron "en mano".

L'ex contable corroboró igualmente que "tien constancia de les tresferencies d'Hunosa a una cuenta bancaria a nome del SOMA-UXT", pero dixo que desconocía'l so destín.

"Tu nun t'esmolezas, ocúpate de que llegue'l dineru y calla", yera la frase que-y tresmitíen cada vez que preguntaba si vía la esistencia de dalguna situación anómala, pero nun pudo recordar "qué persona-y lo dixo".

El testigu rellató que, nuna ocasión, l'acusáu Pedro Castillejo encamentó-y que, ante la esistencia d'un desfase detectáu nes cuentes, roblara un papel diciendo que "lo que faltaba tresmanárase", pero él refugó esta idea.

La perda de les tarxetes yera "el pan de cada día" nel casu de Villa y "cada dos por tres tenía un teléfonu que s'escacharraba", comentó na so declaración énte'l tribunal de la Sección Tercera.

Juan Cigales afirmó qu'apreció un cambéu nel estáu mental del ex secretariu xeneral del SOMA-UXT, que llegó a comentar con otros compañeros, a los que-yos dicía: "paez que ta como alloriáu, pero ellos dicíenme que sedría pa mi porque cuando xubía a la Executiva ponnos a parir", amestó.

Hunosa corrobora'l pagu de cheques nominativos a Villa

Dos de los presidentes de la empresa pública Hunosa, qu'exercieron dende los años 1996 hasta anguaño, corroboraron la esistencia del pagu de cheques nominativos al ex-secretariu xeneral del SOMA-UXT, José Ángel Fernández Villa, mientres que les tresferencies bancaries facíense directamente al so nome.

Los pagos ficiéronse como en dietes por asistencia a les xuntes de los comités intercentros y por desplazamientos.

Nel casu del SOMA-UXT, los cheques diben directamente a nome del so ex-secretariu xeneral, José Ángel Fernández Villa, según quedó de manifiesto na tercer sesión de la vista oral del xuiciu que se sigue escontra él por un delitu siguíu d'apropiación indebida.

Luis Tejuca, presidente de la empresa pública Hunosa nos años 1996 a 2004, aseguró que s'abonaba a los asistentes los gastos por desplazamientu y unes dietes que taben afitaes por convenios, siendo pagaes a les organizaciones sindicales en función del númberu d'asistentes.

Sicasí, puntualizó que'l pagu de dietes yera competencia de la estaya de Recursos Humanos: "Yo nun roblaba'l cheque, nin lu apurría y desconozo si se pagaba directamente a José Ángel Fernández Villa", manifestó.

A partir del añu 2001 cambió'l procedimientu de pagos y entamó a facese al traviés de tresferencies bancaries a nome del SOMA-UXT, ensin actividá sindical, en llugar d'a'l SOMA-FITAG-UXT.

L'actual presidenta d'Hunosa, María Teresa Mallada, reconoció que "a fuerza de buscar nos archivos" tuvo una "conocencia relativa" del sistema de pagos que se ficieron enantes de la so llegada a la presidencia, en febreru de 2012.

Maria Teresa Mallada esplicó que se facíen pagos en cheques nes feches ente 1989 y 1993, con referencies de pagos en llibros contables; dende 1993 a 2001 la copia de los cheques y a partir de 2001 facíase per tresferencies por asistencia a los comités.

Indicó qu'en mayu de 2012 decidió "de manera unillateral" nun siguir faciendo los pagos por asistencia al Comité Intercentros, ante la delicada situación económica pola que pasaba la empresa.

Secretaries de Villa reconocen cobrar personalmente los cheques

Otres dos secretaries que trabayaron pal ex-secretariu xeneral del SOMA-UXT, José Ángel Fernández Villa, reconocieron que llegaron a cobrar personalmente los cheques nominativos que l'ex líder sindical, al que llamaben "el xefe", dába-yos cola so firma estampada na parte posterior, pa que fueren a una entidá bancaria y, en recoyendo'l dineru, dábenlo "en mano y que nun lo asoleyaren perhí".

"Dicíame que yera del conseyu d'alministración d'Hunosa. Diba robláu per detrás y diba a la Caxa d'Aforros a cobralu col so DNI", aseguró una d'elles na so declaración énte'l tribunal de la Sección Tercera de l'Audiencia Provincial que xulga a Villa por un delitu siguíu d'apropiación indebida de fondos del SOMA-UXT por importe de 434.158 euros.

La mesma secretaria amestó qu'entamó cobrando "cientu y picu mil pesetes y cuando acabamos yeren doscientes o trescientes mil".

La secretaria almitió que "en dalguna ocasión" llegara a roblar nel so nome en dalguna convocatoria, pero siempres "col so consentimientu".

Nun sen asemeyáu pronuncióse otra secretaria, qu'exercía funciones de sustitución y que reconoció que tamién cobró los cheques cuando diba a la entidá bancaria "de xemes en cuando" y que él namás-y dicía: "vete rápido y nun t'entretengas".