L’Hotel Exe d’Uviéu prepara les sos cames pa sanitarios

Destináu a personal asintomático, que prefier tar fuera de les sos cases pa protexer a les sos families

El Principáu habilitará esta selmana un hotel del centru d’Uviéu como residencia pa los profesionales del SESPA, tanto sanitarios como non sanitarios. Ye personal que nun manifiesta síntomes del COVID-19 pero que, por voluntá propia, decidan tar n’aisllamientu fuera de les sos cases pa protexer a les sos families.

L’Exe Uviéu Centru ye l’hotel que se va habilitar como residencia pa trabayadores del Sespa que quieran tener un aisllamientu preventivu o en vixilancia pasiva.

Ye un serviciu pa profesionales sanitarios y non sanitarios que prefieran tar fuera de les sos cases pa protexer a les sos families.

Los trabayadores que puen agospiase equí nun manifiesten síntomes de coronavirus, pero son personal en contactu estrechu colos afectaos pol COVID-19. Poro, tienen que siguir una rutina caldía de control, como tomar la temperatura pa saber si presenten síntomes.

Sedrán los servicios de riesgos llaborales de les distintes árees sanitaries los que valorarán l’usu d’esti recursu. L’hotel, que cuenta con más de 100 places, tará disponible esta mesma selmana.

Ta asitiáu a menos de tres kilómetros del HUCA.

Los profesionales llegaríen al centru hospitalariu nunos cinco minutos en coche.

Fornos y despenses pa comer dientro de los camiones y más torgues de les avezaes

Los tresportistes llamenten los inconvenientes que sufren en ruta pola crisis del coronavirus

Los profesionales del tresporte llamentaron les torgues poles que tán pasando estos díes pa trabayar na carretera pol estáu d’alarma nel que tamos.

Los hoteles tán zarraos, poro, tienen grandes torgues pa llevar a la boca un platu de comida caliente en plena crisis del coronavirus. Los más apáñense utilizando un pequeñu fornu pa comer daqué caliente na cabina del camión.

Les estaciones de serviciu son unu de los principales abellugos pa los camioneros nestos díes de cuarentena, pero los más nun tienen tolos servicios disponibles pa duchase o camudar, por exemplu, los neumáticos.

La gasolinera de La Vega, asitiada a l’altura del conceyu de Llanes, ye una de les poques que cuenta con tolos servicios necesarios a dambos llaos de l’autovía.

Munchos bares y restauranes de carretera abrieron les sos cocines de forma altruista pa dar más facilidaes a los tresportistes, unu de los sectores fundamentales pal abastecimientu de productos de primer necesidá nos nuestros mercaos.