L’octavu casu de coronavirus, en bon estáu y n’aisllamientu domiciliariu

Ye una persona que taba en siguimientu por ser un "contactu casual" col primer afectáu

L’home de 56 años, octavu casu de coronavirus detectáu n’Asturies, ta en bon estáu y n’aisllamientu domiciliariu y ye una persona que taba en siguimientu por ser un "contactu casual" col primer afectáu pola enfermedá na comunidá, informó la Conseyería de Salú.

Esti departamentu confirmó ayeri pela nueche esti nuevu positivu, dempués de los resultaos algamaos pol Llaboratoriu de Viroloxía del Hospital Universitariu Central d’Asturies (HUCA), que lleva feches 171 pruebes por sospecha de COVID-19.

Esti últimu casu manifestó síntomes leves y, al tar siendo vixiláu como un contactu de riesgu baxu d’un casu anterior, activóse la recoyida de muestres que dieron positivu.

Dende entós ta n’aisllamientu en so casa y con bon estáu.