L'Asociación de Diabéticos reclama meyorar l'atención de los neños nos colexos

Los afectaos promueven una cultura d'alimentación saludable y formar a la sociedá

Con una suelta de globos azules y blancos, l'Asociación Asturiana de Diabéticos recuerden la necesidá de meyorar l'atención nos centros escolares, a los neños y neñes con esta enfermedá.

El Día Mundial ye mañana pero güei peles cais de Xixón caminaron mediu centener de persones pa visibilizar una dolencia que pue llegar a matar si nun se trata. Piden, tamién, igualar los derechos de les persones col tipu 1 y el tipu 2 de diabetes.

Los afectaos promueven una cultura d'alimentación saludable y formar a la sociedá

Problemes gastrointestinales y muncha sede. Son los primeros síntomes de Sebastián Suárez. Con 8 años diagnosticáron-y diabetes tipu 1 en México. Siendo tan neñu amoldóse bien pero recuerda la desinformación de la so redolada.

Con más edá foi diagnosticáu'l so hermanu pequeñu a los 15. A Jorge Suárez costó-y más adaptase.

Pa so madre, Christian Díaz Barriga, foi duro aceptar la enfermedá de los sos fíos. Nun había casos na so familia y nun conocía la diabetes. Por eso propón que se forme a la sociedá sobre lo qu'implica carecela. Y tamién reclama que se fomente l'alimentación saludable.

La clave diz Christian ye ser consciente de que ye incurable y de los cambeos nel estilu de vida qu'implica. Vezos que se deben asumir cuanto enantes pa sobrevivir.

A pesar de que la diabetes tipu 1 rebaxa la esperanza de vida toos coinciden en que ye importante ser positivu y nun velo como una traxedia.