L'Audiencia d'Uviéu ordena prisión provisional pa Natalio Gruesu

Orde de busca y captura al tar en paraderu desconocíu y énte'l riesgu de fuga

L'Audiencia Provincial d'Asturies dictó un autu pol qu'ordena l'ingresu en prisión provisional, comunicada y ensin fianza pal ex-director xeneral de la Fundación Niemeyer d'Avilés Natalio Grueso, en paraderu desconocíu y que tien que ser xulgáu a partir del próximu 24 de setiembre.

Nel so autu, la sala de la Sección Tercera de l'Audiencia Provincial argumenta que l'acusáu "facilitó a los muérganos xudiciales que conocen d'esti procedimientu hasta dos cases distintes que nun se correspuenden con nenguna que seya so pal control de tar a disposición d'esti Tribunal".

Pa la sala, eso determina "el convencimientu fundáu de que se sustraxo a l'acción de la xusticia al constituyise n'ignoráu paraderu materializando'l riesgu de fuga".

El tribunal llibró les requisitories pertinentes pa la so localización y puesta a disposición del tribunal.

La Fiscalía pide pa Natalio Gruesu una pena de 11 años de cárcel, 10 años d'inhabilitación y una multa de 24.000 euros, por presuntes irregularidaes na so etapa al frente del Centru Cultural Niemeyer d'Avilés, rellacionaes cola emisión de factures falses o manipulaes.

Tamién lu acusa de delitos siguíos de malversación en concursu medial con falsedá, otru societariu y un terceru d'insolvencia punible.