L'Audiencia suspende'l xuiciu escontra Villa pol so ingresu hospitalariu

El péritu auditor del Infide fala d’un descontrol mayúsculu na contabilidá

El tribunal de la sección tercera de l’Audiencia Provincial alcordó que l’ingresu de José Ángel Fernández Villa, ex-secretariu xeneral del SOMA-UXT, na planta de Cardioloxía del Hospital Universitariu Central d’Asturies (HUCA) ye causa suficiente pa la suspensión de la causa que se sigue escontra él.

El xuiciu namái siguirá sobre’l co-acusáu Pedro Castillejo, ex-secretariu xeneral del Patronatu de la Fundación Institutu pa la Formación, Investigación, Documentación y Estudios Sociales (Infide).

L’abogada defensora de José Ángel Fernández Villa, Ana García Boto, interesó la suspensión del xuiciu atendiendo al criteriu de que l’ex-secretariu xeneral del SOMA-UXT siguía, güei, ingresáu.

Al so pidimientu sumóse’l fiscal Enrique Valdés-Solís, que pidió que se dea treslláu a los facultativos del HUCA pa qu’informen del so estáu, y pronuncióse a favor de que’l xuiciu siga namái escontra Pedro Castillejo.

El fiscal consideró que l’ingresu hospitalariu ye "causa llegal de suspensión y nun queda otru remediu”, amestó.

Valdés-Solís pronuncióse asina a favor del pidimientu de l’abogada Ana García Boto, qu'exercita la defensa de José Ángel Fernández Villa, que, al entamu de la cuarta sesión de la vista oral, na Audiencia Provincial d’Uviéu, pidió la suspensión del xuiciu que se sigue escontra él hasta que se dea la so alta hospitalaria y foi aceptada pol tribunal.

Fernández Villa ingresó na planta de Cardioloxía del Hospital Universitariu Central d’Asturies (HUCA), na nueche del vienres pasáu, dempués de sentise indispuestu, al acabar la tercer sesión de la vista pola qu’afronta una petición fiscal de cinco años de cárcel pola so presunta autoría nun delitu siguíu d’apropiación indebida.

L’abogada Ana García Boto confirmó al tribunal de la sección tercera de l’Audiencia Provincial que "pondrá nel so conocimientu cualquier novedá" que faiga referencia al estáu de salú del so representáu.

El fiscal pidió que se dea treslláu al HUCA pa que los facultativos qu’atienden a Fernández Villa en Cardioloxía emitan un informe médicu y faciliten una previsión d’alta hospitalaria pa fixar una nueva fecha pal señalamientu de la continuación de la vista escontra Villa.

En sala recordóse que, nel casu de qu'hubiere alta hospitalaria, nun plazu superior a 30 díes, "fadría falta repetir el xuiciu dende l’entamu, como marca la llei".

Dempués de la suspensión de la vista escontra Fernández Villa, la vista oral siguió únicamente escontra’l co-acusáu Pedro Castillejo, ex-secretariu de la Fundación Institutu pa la Formación, Investigación, Documentación y Estudios Sociales (Infide), qu’afronta una petición fiscal de tres años y mediu.

Na cuarta sesión de la vista oral, prestaron declaración patronos del Infide, dirixentes y ex-dirixentes del sindicatu pa esplicar el papel que desendolcaba Pedro Castillejo na fundación.

Ente otros testigos declararon el que fuere presidente del Montepío de la Minería, José Antonio Postigo, los patronos José Manuel González, Alfredo Carreño y Víctor Folgueiras.

El péritu Mariano Bel indicó qu’emitió un informe sobre la contabilidá oficial, los documentos xustificativos d’esta y los estractos bancarios d’Infide, donde vieron "una cantidá d’errores" a partir de los que "buscaben los xustificantes".

"Dábenme documentos que dicíen qu’había una comida, pero nun dicía nin qué persones comieren, nin dicíen cada gastu que teníen con cada xera, porque ye como si se va pelos sitios a garrar xustificantes y voi coles mios collacies y paso los gastos", desplicó sobre’l procedimientu siguíu.

Mariano Bel comentó que los xustificantes nun se correspondíen colos gastos, nin colos anticipos y él tampoco llegó a ver "nunca" una devolución de dineru.

"¿Gastó usté 400 euros, 300 euros redondos?, pero ¿ónde tán los céntimos?", yeren les entrugues que se plantegaba’l péritu al ver los documentos que-y presentaben dende Infide pa que comprobare la contabilidá.

"El mio informe ye un relatu siguíu de los errores contables, unes vegaes por mor de la impericia del propiu contable que ta más qu’acreitada, porque si nun tien medios nun podrá nunca facelo bien y mal pue xustificar los gastos si se sacaben de caxa y nun hai arqueos", dixo testualmente.

"Esti señor (Juan Cigales) tenía hasta cuatro caxes distintes y el descontrol yera mayúsculu", insistió Mariano Bel na so declaración.

"Hebo un momentu nel que-y dixi: Juan (Cigales) tráimelo too porque al final el más perxudicáu vas ser tu", aseguró que-y dixo al ex-contable y esti dio-y tola documentación que, según-y esplicó, tenía nel so poder.