L'Executivu da lluz verde al creitu estraordinariu de 111,3 millones

Quier iguar los efectos negativos de la prórroga de los presupuestos rexonales

El Conseyu de Gobiernu aprobó güei'l proyectu de llei de creitu estraordinariu de 111,3 millones d'euros col que quier iguar los efectos negativos de la prórroga de los presupuestos rexonales nel presente exerciciu.

D'esta cantidá, 44,9 millones dirán destinaos a amortizar delda, otros 15 millones a complementar la partida destinada al pagu del salariu social y 51,4 millones a actuaciones como la meyora de la ufierta del ciclu infantil de cero a tres años o a inversiones en carreteres y puertos

La petición de creitu del Executivu tendrá agora que ser tramitada nel parlamentu rexonal onde, si se lleva alantre pol procedimientu d'urxencia, podría ser finalmente aprobáu nel plazu d'unos dos meses, tiempu que se vería notablemente menguáu si se lleva alantre pol de llectura única, como quier el Gobiernu y defenden grupos como IX.

Al acabar la xunta selmanal del Conseyu de Gobiernu, el voceru del Executivu asturianu, Guillermo Martínez, afirmaron que l'aprobación d'esti creitu "ye necesaria dafechu", mientres que la conseyera de Facienda y Sector Públicu, Dolores Carcedo, amosó'l so deséu de qu'ésti cuente col mayor sofitu posible na Cámara rexonal.

"Va remitise yá a la Xunta y esperamos que s'apruebe darréu pa que los sos efectos se noten tamién cuanto enantes", conseñó la conseyera tres señalar que Podemos y IX yá avanzaron que sofitarán la llei, que col PP tán a la espera de que se cierren dellos puntos y qu'espera que Foro y Ciudadanos tamién se sumen finalmente al pautu nel procesu parlamentariu.

Los 4.213 millones del presupuestu prorrogáu de 2017 son insuficientes p'atender les necesidaes y inversiones del presente exerciciu polo que, según recordó Carcedo, esti creitu valdrá pa completar les cuentes y iguar los efectos derivaos tamién de la retención que'l Gobiernu central fizo de 116 millones de la financiación autonómica.

Ye una doble prórroga, polo tanto, a la que tien que facer frente l'Executivu que preside Javier Fernández, conseñó la titular de Facienda que, sicasí, enfótase en que finalmente esos 116 millones lleguen a lo llargo del Exerciciu.

Nel casu de que'l 15 de setiembre nun se ficiera efectiva esa transferencia, esti proyectu de llei prevé aplazar 27,6 millones de les inversiones programaes pa poder garantizar el pagu de los gastos derivaos de la delda.

De los 111,3 millones que'l Gobierno quier amestar al so presupuestu, 98 van garrase al traviés d'endeldamientu y los 13,3 millones restantes por recursos provenientes del Fondu Européu Agrariu de Desarrollu Rural (Feader).

Con esos recursos, podrán destinase 15 millones más al salariu social, qu'esti añu supondrá un gastu de 120 millones, amortizaráse delda por importe de 44,9 millones y invertiránse otros 51,4 millones.

Nesti últimu apartáu amiéstense los 2,48 millones destinaos a ampliar y financiar la rede d'educación infantil de cero a tres años, incluyida una rebaxa del 50% na cuota que pagarán les families a partir del próximu cursu, midida que llevó a Podemos a dar finalmente'l sofitu a esta llei.

Otros 1,57 millones dirán destinaos a facer frente a la convocatoria de nueves oposiciones n'educación y 1,62 millones a completar los compromisos de financiación de la Universidá.

Otra partida de 17,5 millones dirá a actuaciones de desarrollu rural, y d'ellos, 6,2 millones dirán a la prevención d'incendios, programa que dispondrá de 14 millones de gastu añal.

No que se refier a inversiones pa la renovación tecnolóxica, 5,45 millones más dirán a la tresformación dixital de l'alministración autonómica, plan que con esta partida contará con más de 16,6 millones esti añu.

El creitu reserva 7,4 millones pa obres en carreteres, puertos y equipamientos hidráulicos, incluyida una partida de 90.000 euros pa iniciar l'estudiu del tren cremallera a los Llagos de Cuadonga que pidiera'l PP, y mediu millón pa combatir el plumeru de la Pampa y l'aviespa asiática.

Otros 2,89 millones tienen como destín la meyora de centros sanitarios, mientres 1,39 millones dirán pa centros educativos, como los institutos de La Corredoria, La Fresneda, La Florida y l'IES Rei Pelayo de Cangues d'Onís, y 600.000 más pa obres en sedes xudiciales.

Tres millones más dirán destinaos a fomentar les inversiones por parte de les empreses y 1,8 millones pa impulsar la economía baxa en carbonu.

"Fízose un esfuerzu pa garantizar recursos y inversiones", conseñó la conseyera qu'insistió en que va facer tolos pidimientos que seyan necesarios pa que seya más áxil l'aprobación d'esta llei.