L'Hostal Favila, ún de los edificios más emblemáticos de Cuadonga

El futuru del equipamientu pasa pola ampliación del Muséu del Santuariu de Cuadonga

El sieglu XX arrancó nel Santuariu de la Santina cola consagración de la Basílica y la nacencia del Parque Nacional del Monte de Cuadonga. Too eso favoreció un boom del turismu y la llegada de más y más pelegrinos. L’interés por da-yos un agospiu económicu y asequible ta nel orixe del Hostal Favila.

Les sos obres de construcción, por distintos motivos, allargáronse más d’una decena d’años.

Falamos d’un edificiu d’estilu rexonalista, el de mayor tamañu del Santuariu, diseñáu polos arquitectos García Lomas y Manchobas. Tien planta rectangular con baxu, tres pisos y dos pórticos llaterales na fachada principal que da a la esplanada del Real Sitiu.

Na Guerra Civil Española, l’edificiu del Hostal Favila foi utilizáu como hospital. Acabada la contienda, y en mui pocu tiempu, recuperó’l so usu hoteleru pa convertise llueu en seminariu.

Dende 1968 l’edificiu del Hostal Favila pasó a ser, n’esclusiva, la sede de la Escolanía de Cuadonga, qu’agora ocupa l’ala derecha del inmueble.

El sieglu XXI entamó con un nuevu usu pa esti históricu edificiu: el museísticu. Les corones de la Virxe y el Neñu, asina como los cuadros de los monarques asturianos que llegaron dende El Prado a Cuadonga en 1884 son dalgunos de los fondos más destacaos d’esti muséu.

El futuru del antiguu Hostal Favila pasa, precisamente pola ampliación del Muséu del Santuariu de Cuadonga por un conveniu robláu ente l’Arzobispáu y la Fundación Cristina Masaveu.