L'alianza poles infraestructures actualízase pa facer d'Asturies un polu loxísticu

El Corredor Atlánticu, exa vertebradora de la "nueva era de les comunicaciones"

El desendolcu del Corredor Atlánticu ferroviariu y la so conexón cola Zona d’Actividaes Loxístiques y Industriales (Zalia) pa facer d’Asturies el gran polu loxísticu del Cantábricu son les exes vertebradores del nuevu alcuerdu de l’Alianza poles Infraestructures qu’esti miércoles roblaron Gobiernu autonómicu, partíos políticos y axentes sociales y económicos.

"Tamos inaugurando una nueva era nes comunicaciones n’Asturies", afirmó dempués de la robla del presidente del Principáu, Adrián Barbón, qu’alvirtió de qu’hai qu’escaecer los vieyos tópicos de que la falta de comunicaciones torga’l despegue económicu de la comunidá y que ve cómo’l "complexu d’aisllamientu va quedando atrás".

Siete años dempués de que se roblare’l primer documentu, el sofitu a la que sedrá la fueya de ruta del Principáu a la hora d’esixir actuaciones al Gobiernu central en materia d’infraestructures viose medráu col sofitu de tolos grupos que formen parte del parllamentu asturianu, inxertu Vox.