La CNMC da vía llibre al usu de la regasificadora d'El Musel como almacén

La planta xixonesa apurrirá al añu hasta 8.000 millones de metros cúbicos de gas natural licuao a Europa

La Comisión Nacional de los Mercaos y la Competencia (CNMC) aprobó güei’l réxime económicu temporal col que funcionará la regasificadora d’El Musel hasta finales de 2026, periodu nel que se piensa que recibirá con cargu al sistema una retribución de 72,4 millones d’euros pa que funcione como almacén de gas licuao.

La regasificadora, que ta n’estáu d’ivernación dende qu’acabó la so construcción en 2013, taba pendiente de l’autorización d’esti modelu de retribución pa qu’Enagás puea entamar a utilizala como planta loxística dende la que suministrar gas licuao al restu del continente y contribuyir a la seguridá enerxética de la Xunión Europa.

Según los cálculos d’Enagás, la planta d’El Musel apurrirá al añu hasta 8.000 millones de metros cúbicos de gas natural licuao (GNL) a Europa, mediante la descarga y carga d’hasta 100 barcos al añu.