La Corriente Sindical d'Izquierdes refuga que'l futuru de Duro Felguera tenga que pasar pol ERE

La última ufierta de la dirección de la compañía rebaxa a 180 los trabayadores afectaos

La Corriente Sindical d’Izquierdes (CSI) en Duro Felguera nun va roblar la última propuesta de la dirección de la compañía qu’afita en 180 los trabayadores afectaos pol espediente de regulación d’empléu (ERE) d’estinción plantegáu p’Asturies, al considerar que nun s’ufierten les "condiciones afayadices" y considerar que’l futuru de la empresa nun pue pasar por un despidu colectivu.

Ye la última ufierta presentada pola dirección de la compañía que rebaxa los afectaos por ERE de los 208 iniciales a 180 dientro d’una plantiya de 1.293 persones, a lo que s’amestaría l’amortización d’otros 40 puestos de trabayu nel estranxeru, una propuesta que voten esti martes les asamblees de los trabayadores.

El representante de CSI nel Comité d’Empresa de Duro Felguera, Rubén Alonso, esplicó en rueda de prensa que’l sindicatu, que representa a cuatro de los 11 miembros de la mesa negociadora, nun va roblar la propuesta porque nun s’ufierten les “condiciones afayadices” na negociación y la empresa nun apurrió tola información necesaria pa xustificar l’ERE.