La Federación de Parroquies Rurales cuantifica en 800 los pueblos abandonaos y desagospiaos n'Asturies

Una cifra que siguirá medrando pol avieyamientu y la falta d'oportunidaes nel sector primariu

Un total de 800 pueblos desagospiaos y abandonaos dafechu n’Asturies, un 60% más qu’a entamos de sieglu. Ye la dura cifra que manexen na Federación de Parroquies Rurales. Y ye qu’insisten, el sector primariu necesita más sofitu y menos lleis.

Va 20 años había 12.800 habitantes nes parroquies rurales. Agora 7.900. Cuasi la metá y medrando, porque calculen que na década viniente perderáse’l 50% de la población.

As Veigas, nel conceyu de Taramundi, ye ún de los munchos exemplos n’Asturies de pueblos que gozaron de gran actividá va décades, pero qu’agora lluchen por siguir con vida. Manuel ye l’únicu vecín que vive equí tol añu. Equí nació hasta qu’a los 18 años foi estudiar fuera y a trabayar d’enfermeru a Madrid. Recuerda’l pueblu con hasta una ventena de vecinos.

Agora, dempués de xubilase, decidió instalase na casa familiar que foi llevantada a mediaos de 1600. Restauró gran parte de la propiedá, inclusive’l vieyu molín del pueblu.

Esti pueblu de Taramundi ye l’exemplu d’un pueblu cuasi abandonáu que recobra la vida. Manuel convive con un negociu de turismu rural. Ye posible gracies a qu’esfruten de tolos servicios, inclusive fibra óptica.