La Feria de Muestres piensa batir el so récor de visitantes y llegar a 740.000

Visitantes, vendedores y espositores echen el pieslle con bones sensaciones

La 65ª edición de la Feria Internacional de Muestres d’Asturies, qu’abrió al públicu’l 6 d’agostu pasáu, pieslla güei cola previsión de los sos entamadores de que’l certame bata’l récor d’asistencia de públicu con unos 740.000 visitantes.

Según fontes de la Cámara de Comerciu de Xixón, entamadora del certame, esa ye la previsión final d’asistencia a poques hores de que pieslle les sos puertes colo que superaría la cifra rexistrada na edición de 2019 cuando 724.314 fueron al recintu ferial Luis Adaro.

Darréu, la FIDMA tuvo que ser suspendida en 2020 por mor de la pandemia del coronavirus y, un añu dempués y tamién como consecuencia de la crisis sanitaria, el certame llevóse alantre pero’l so aforu menguó a la metá que davezu.

De cara a esta edición unes 2.000 empreses tuvieron presencia nes cuasi 700 unidaes d’esposición instalaos nos 160.000 metros cuadraos del recintu ferial nos quince díes que s’allarga un certame que xenera nesi periodu unos 3.000 trabayos.​