La Fiscalía investiga'l grau d'implicación de la familia de Villa y Postigo nel casu del Montepío

Cuasi toos ellos trabayaron en distintos puestos que'l Montepío tien n'España

L'ex-cabezaleru del SOMA José Ángel Fernández Villa y la so mano derecha, José Antonio Postigo colocaron a los sos más averaos nos complexos residenciales que'l Montepío xestiona en delles ciudaes españoles.

Nel casu de Villa, situó al so fíu, Rolando al frente del complexu del Montepío en Felechosa, construcción que superó los 32 millones d'euros y que ta siendo investigada asina como les cuentes de la entidá. El so contratu, blindáu en más de 80.000 euros, acabó nos xulgaos cuando lu despidieron dempués de destapase la regularización de la fortuna de so padre.

Pero foi Postigo, cuando tuvo al frente del Montepío, el que más allegaos colocó. A la so fía Elena la constructora Alcedo de los Caballeros. Foi la empresa a la qu'encargó'l xeriátricu de Felechosa. A otra fía, Patricia, colocóla nel departamentu de personal del Montepío. Ellí trabayó más de dos años, hasta que foi cesada al destapase qu'ella tamién regularizó 60.000 euros acoyéndose a l'amnistía fiscal.

Postigo tamién colocó a la so compañera sentimental, Dorina Bicher al frente del complexu residencial que'l Montepío tien en Los Alcázares, Murcia, tamién con un contratu blindáu.

Pa rematar un primu de Postigo ye l'únicu que sigue al frente del Complexu residencial de Roquetas de Mar n'Almería onde van en branu los mutualistes.

Agora Anticorrupción trata d'analizar en qué midida unos y otros pudieron participar nos delitos que s'investiguen.

Siguen les reacciones polítiques y sindicales a esta investigación. Les últimes, les del voceru de Podemos y el cabezaleru sindical de Comisiones Obreres d'Asturies.