La Fiscalía opónse a la suspensión de cárcel pa Riopedre

La defensa del empresariu Alfonso Carlos Sánchez pelea pola so puesta en llibertá

Nun escritu mandáu yá a l’Audiencia, la Fiscalía opónse al pidimientu de la defensa de José Luis Iglesias Riopedre, que solicitaba que se suspendiere la pena por razones humanitaries o mientres se resuelva l’indultu solicitáu.

Pal Ministeriu Públicu, esti pidimientu nun ta xustificáu. A xuiciu de so nun procede suspender la execución de la condena de más de cinco años de prisión impuesta al ex-conseyeru. Asina lo treslladó la Fiscalía a l’Audiencia, dempués de pidir esta la so opinión, enantes d’emitir un autu cola so decisión.

Mientres, la defensa del empresariu Alfonso Carlos Sánchez sigue lluchando pola so puesta en llibertá, y recurrió la decisión del tribunal de refugar l’indultu solicitáu.

El lletráu Javier Díaz Dapena pide a la Sala que reconsidere la so postura. Recuerda que la decisión ye del Conseyu de Ministros y cuestiona que se ficiere un análisis dafechu de los motivos polos que l’indultu pue ser refugáu, cuando ye daqué, asegura, que nun se pue predicir.

El lletráu solicitó amás que l’ex-dueñu d’Almacenes Pumarín quede al marxe de la responsabilidá civil que se reclama a los demás acusaos, al ser absueltu del delitu de malversación. Amás, pide que se-y dexe fraccionar el pagu de la multa de cerca de dos millones d’euros a la que foi condenáu.

Per parte de so, la defensa d’Antonio José Azorín, condenáu a ocho meses de cárcel, pidió güei la suspensión de la condena o’l so cambéu por trabayos en beneficiu de la comunidá.