La Fiscalía pide ampliar la prisión de tres de los acusaos de la muerte d'Ardines

Los acusaos de matar a Ardines piden la so llibertá por salú y enraigonamientu

El presuntu inductor, l'intermediariu y unu de los supuestos sicarios acusaos pol asesinatu del conceyal d'IX en Llanes Javier Ardines pidieron esti llunes, al traviés d'una videoconferencia dende la cárcel, la so puesta en llibertá provisional alegando que nun se van fugar por tener enraigonamientu familiar n'España y por motivos médicos, según informaron les sos defenses.

La Sección Segunda de l'Audiencia Provincial d'Uviéu celebró esti llunes la vista de los recursos pa la posible escarcelación del presuntu inductor Pedro L.N., l'intermediariu Jesús M. y el supuestu sicariu arxelín Djillali B. al cumplise esti mes los dos años del so ingresu en prisión preventiva.

Pela so parte, la Fiscalía y l'abogáu Antonio Pineda, que lleva l'acusación particular en nome de la familia d'Ardines, pidieron al tribunal la prórroga de la prisión provisional, comunicada y ensin fianza de los tres acusaos pa garantizar la so presencia nel xuiciu, que va tener llugar con un xuráu nuna fecha ensin determinar, anque los lletraos prevén que podría celebrase'l próximu branu.

Les acusaciones sostuvieron el so pidimientu na esistencia de riesgu de fuga pola gravedá de la pena que trai'l delitu d'asesinatu y pol que los acusaos encaren un pidimientu individual de 25 años de prisión.