La Fiscalía rechaza la incapacidá pidida pa Villa pola so familia

Considera que les limitaciones que padez "nun-y torguen gobernase por sí mesmu"

La Fiscalía del Principáu d'Asturies rechazó la solicitú d'incapacidá plantegada pola familia del ex-secretariu xeneral del SOMA-UXT, José Ángel Fernández Villa, pal ex-líder sindical mineru, que s'enfrenta a un xuiciu por un presuntu delitu continuáu d'apropiación indebida nel sindicatu.

El Ministeriu Públicu informó de que considera que les limitaciones físiques y psíquiques que padez Fernández Villa "nun-y torguen gobernase por sí mesmu", polo que nun considera afayadizo "per agora" interponer demanda pa modificar la so capacidá, como pidiera la so familia'l pasáu mes de marzu.

Por ello, la Fiscalía alcordó l'archivu de les dilixencies informatives incoaes, nes que, a lo llargo de cuasi cuatro meses, "analizó fondamente l'abondante documentación esistente al respective".

La familia del ex-líder sindical tien entá la posibilidá de pidir la incapacidá de Fernández Villa ante los xulgaos.

La decisión de la Fiscalía llega depués de que'l Xulgáu d'Instrucción númberu 2 d'Uviéu diera la selmana pasada por cerrada la instrucción y elevara a l'Audiencia Provincial la causa abierta por un delitu siguíu d'apropiación indebida escontra Fernández Villa y l'ex-secretariu de la Fundación pa la Formación, la Investigación, la Documentación y los Estudios Sociales (Infide) Pedro Castillejo.

El xuiciu, que previsiblemente se celebrará nel primer semestre de 2018, queda pendiente del repartu y señalamientu por parte de l'Audiencia.

La xueza yá decretara'l pasáu mes de mayu l'apertura de xuiciu oral escontra Fernández Villa y Castillejo na causa entamada a partir de la querella por apropiación indebida presentada pol sindicatu, cola imposición d'una fianza de 434.158 euros al primeru y de 119.434 euros al segundu, polos importes presuntamente apropiaos.

Amás de les correspondientes indemnizaciones, la Fiscalía pide nesti casu cinco años de cárcel pa Fernández Villa y tres y mediu pa Castillejo, unes penes que l'acusación particular del sindicatu, representada pol despachu Ontier, eleva a seis y cinco años de prisión, respectivamente.

Según el fiscal, el que fuera líder del sindicatu mineru más de 35 años exercía una "posición de dominiu absolutu" na organización y yera quien tomaba toles decisiones, incluyida la de crear l'Infide y poner a Castillejo al frente d'esi organismu.

El Ministeriu Públicu espón nel so escritu d"acusación que Fernández Villa, "aprovechando la so posición de control dafechu de la entidá, ideó un plan empobináu a desviar los fondos del sindicatu al so patrimoniu personal" qu'ente 1989 y 2010 dio-y 434.158 euros.

Al marxe d'esti casu, Fernández Villa tamién ta siendo investigáu pola Fiscalía Anticorrupción pol orixe de los 1,4 millones d'euros que regularizó tres la última amnistía fiscal, y ye unu de los investigaos na nomada Operación Hulla, que punxo'l focu nel supuestu desvíu de fondos na construcción d'un xeriátricu del Montepío de la Minería nel llugar asturianu de Felechosa.