La Guardia Civil ve estraña la priesa de Nieva pa que la so asistenta fuere a llimpiar

Ve afitao que los cuatro investigaos formaron un grupu criminal

La Guardia Civil considera "estremadamente estraña" la priesa que’l presuntu autor intelectual del crime d’Ardines, Pedro Nieva, tuvo’l mesmu día del crime pa que la so asistenta fuere llimpiar a la so casa d’Amorebieta.

Según apaez na investigación, la so actitú llevantó sospeches en cuantes a la so posible participación material nos fechos.

El mesmu día del crime de Javier Ardines, el presuntu autor intelectual, Pedro Nieva, pidió-y a la so muyer per mensaxe de WhatsApp a les 10:00 de la mañana, que-y pasare’l teléfonu de l’asistenta. A ella estrañó-y esi pidimientu y al entrugar que pa qué la necesitaba, el presuntu inductor aseguró que quería que camudare les sábanes, ficiere la colada y planchare.

Dempués de los testimonios recoyíos, ente ellos el de la persona que facía eses xeres de llimpieza, los axentes manifiesten les sos duldes sobre esta actitú.

Sorpriénde-yos tamién qu’esi xueves 16 d’agostu, Pedro Nieva abandonare so casa más tarde que davezu, sobre les 09:45 de la mañana cuando davezu, según los testimonios recoyíos, solía facelo enantes de les 9:00. Too ello, xunto a que’l so móvil nun tuviere actividá nunes hores clave, llevanten les sospeches de los investigadores en cuantes a la posible participación material de Nieva nel crime.

Él, na so declaración énte la Guardia Civil, negó cualquier tipu de participación nestos fechos. De los presuntos implicaos, namái reconoció que tenía rellación col presuntu intermediariu por trabayu y asegura que nun conoz a los presuntos autores materiales.

Afitao que los cuatro investigaos formaron un grupu criminal

Pa la Guardia Civil queda afitao que los cuatro investigaos formaron un grupu criminal que tenía como oxetivu atentar escontra la vida de Javier Ardines. Caún tenía un repartu específicu de xeres na planificación y execución darréu del asesinatu.

Pedro Nieva sedría l’autor intelectual, Jesús Muguruza, l’intermediariu, cuya participación, diz l’atestáu, "resultó imprescindible" y los dos ciudadanos arxelinos sedríen los presuntos autores materiales.