La Ilesia de San Vicente, unu de los monumentos relixosos más destacaos del conceyu d'Ayer

Abierta al públicu pel branu, nos meses de xunetu y agostu

Monumentu histórico artísticu declaráu en 1983, la Ilesia de San Vicente ta a un kilómetru del llugar ayerán de Serrapio.

Llevántase sobre un mirador con vistes al valle mediu del Ayer y ye unu de los monumentos relixosos más destacaos del conceyu.

Sufrió delles alteraciones a lo llargo de la so hestoria, del so estilu románicu caltiénse la cabecera de la ilesia, la sacristía y la pila bautismal.

Una de les sos xoyes ye una ara votiva n'honor a Xúpiter, encrastada na conocida como la Sala de les Llábanes. Destaca l'arcu del trunfu que da pasu al altar, y los sos capiteles historiaos de gran guapura, teníen una doble función, decorativa y moralizante.

Destaquen tamién les sos pintures murales, posteriores al sieglu XV, caltiénense escenes de la Pasión de Cristu dataes nel XVI. A entrambos llaos del altar, na capiya de la izquierda, tán representaos San Cosme y San Damián; a la derecha, San Xuan Bautista y San Andrés.

Abre al públicu pel branu, nos meses de xunetu y agostu.