La Princesa Leonor abre n'Asturies la so xera institucional

Los Reis y les fíes fueron recibíos ente'l son de les gaites y vítores

La Princesa d'Asturies llegó güei a la Basílica de Cuadonga colos Reis y la infanta Sofía na so primer xera oficial nesta Comunidá, onde asisten a les conmemoraciones de la fundación del reinu asturianu, la coronación de la Virxe y la creación del primer parque nacional.

Ente'l son de les gaites y vítores y aplausos de los vecinos qu'esperaben la llegada, los Reis y les fíes fueron recibíos pol presidente d'Asturies, Javier Fernández, el del Parlamentu autonómicu y l'alcalde de Cangues d'Onís ante la Santa Cueva. Nel so interior l'arzobispu d'Uviéu, Jesús Sanz Montes, dedicó-yos unes palabres, con una mención espresa a la heredera de la Corona.

Tres agradecer la presencia en Cuadonga, l'arzobispu empobinóse a la "Princesina" nestos términos: "Que la Santina guíe los vuestros pasos y que vuestra Alteza medre sana, sabia, santa y 'guapa', como equí llamamos a les coses y persones fermoses".

"Que María de Cuadonga guarde a esta querida Familia Real nun momentu decisivu y delicáu pa España", amestó monseñor Sanz, quien fizo entrega a los Reis de la medaya conmemorativa del centenariu de la coronación canónica de la Santina y ufiertó a la Princesa y la infanta con sendes medayes de la Virxe qu'amosaben nel so reversu la Cruz de la Victoria, símbolu d'Asturies.

El gaiteru asturianu José Ángel Hevia, premiáu cola Medaya d'Asturies, interpretó l'Himnu de la Virxe de Cuadonga na visita a la cueva en que se venera la imaxe atopada, según la tradición, nel sieglu VIII nesi llugar, onde los Reis y les fíes, acompañaos en tou momentu pol ministru Luis Planas, averáronse amás al túmulu de don Pelayo enantes de dirixise a la basílica.

Ellí fueron depués a una misa solemne oficiada pol arzobispu d'Uviéu y concelebrada polos arzobispos de Santiago de Compostela, Granada, Burgos y el cardenal Antonio María Rouco Varela, tres la que saludaron a los cinco ex-presidentes autonómicos asturianos.

Darréu, conmemoraron los 13 siglos trescurríos dende la fundación del Reinu d'Asturies con una ufierta floral ante la estatua de Don Pelayo y les visites a una esposición sobre los socesivos reis d'España, con fondos del Muséu del Prado, y a una muestra fotográfica sobre Cuadonga con obres de Fernando Manso, dambes nel muséu d'esti Real Sitiu.

Amás, el presidente autonómicu entregó a la Princesa d'Asturies de la insignia de la Cruz de la Victoria, un regalu que nel so día tamién recibió so padre pola so condición d'herederu de la Corona.

Yá pela tarde, los Reis presidieron coles sos fíes la celebración del primer centenariu del Parque Nacional del Monte de Cuadonga -embrión del actual Parque de los Picos d'Europa- ante'l llagu Enol, onde la Princesa foi obsequiada pol Conceyu de Cangues d'Onís con una yegua de la raza 'Montaña asturiana'.

Los Reis y les fíes llegaron a Cuadonga per carretera desde Cangues d'Onis, onde'l so helicópteru aterrizó cerca d'una residencia de mayores, xunto a la que saludaron y se fotografiaron con dalgunos de los empleaos y residentes nesti centru.