La UCO descarta que los sicarios solo quixeren da-y una paliza a Javier Ardines

Un axente de la Unidá Central Operativa niega presiones y coacciones a Djilali Benatia

Un axente de la Unidá Central Operativa (UCO) de la Guardia Civil que participó na investigación del asesinatu del conceyal d’IX en Llanes Javier Ardines refugó esti martes que’l presuntu sicariu Djilali B. fuera "presionáu" o "coaccionáu" a la hora de declarar, lo que motivó que’l procesáu la interrumpiere a glayíos delles vegaes hasta que’l maxistráu tuvo qu’echalu de la sala.

El testimoniu del axente na quinta sesión del xuiciu que se sigue na Audiencia Provincial pol asesinatu tuvo momentos de tensión cuando’l presuntu sicariu interrumpió al axente tres vegaes pa rebatilu.

L’axente insistió en que les acusaciones de Djilalli B. son "mentira" y defendió que la UCO siempres trabaya dende la más estricta llegalidá y en nengún momentu se-y presionó.

“Va usté de bonu y nun ye asina", replicó l’acusáu mientres negaba insistentemente cola cabeza cuando abandonaba dando voces la sede xudicial custodiáu por un axente de la Policía Nacional.

Nel so testimoniu, l’axente de la Sección d’Homicidios, Secuestros y Estorsiones de la UCO amestó que nun consta nes actuaciones nin una sola denuncia por presiones na so declaración y recordó que’l lletráu que lu representa ye’l mesmu que lu asistió dempués del prindamientu.

L’axente insistió que nos calabozos de toles dependencies de la Guardia Civil hai cámares de vixilancia, poro, nel casu de qu’entendiere qu’hubo dalguna irregularidá podríen pidiles, porque se guarden un mes.