La UCO investiga les ayudes al Montepío pa la construcción del xeriátricu de Felechosa

Los conceyales del PSOE y IX investigaos pol Casu Hulla recurren l'autu de la xueza

El cambéu del Real Decretu que dexó dar ayudes al Montepío pa la construcción de la Residencia de Felechosa, foi calificada hasta en tres causes de "rara" pol abogáu d'Estáu de la secretaría d'Enerxía. Entá asina conseñaba que s'axustaba a derechu, anque él considerábala inconveniente y plantegaba una serie d'encamientos.

Nesi informe, amestáu a la causa, el lletráu califica'l cambéu que se plantega d'importante por inxertar una nueva tipoloxía de beneficiariu, mui distinta a la qu'esistía hasta'l momentu.

Considera qu'esi cambéu constitúi un elementu raru na configuración de les ayudes, porque namás escepcionalmente déxase que vayan empobinaes a entidaes que nun seyan les alministraciones públiques territoriales cuando la entidá beneficiaria seya ensin ánimu d'arriquecimientu con unos determinaos requisitos.

Nel so informe, l'abogáu conseña que resulta rara la introducción de les entidaes y sociedaes empresariales nel esquema del Real Decretu. A pesar de considerar el cambéu inconveniente, y por eso plantegar una serie d'observaciones, el lletráu puntualizaba que sí cumplía los requisitos llegales.

La UCO entrugába-y, como testigu, el pasáu 7 de marzu. Tamién llamaba a declarar al interventor que dio'l preste al Conveniu de collaboración ente l'Institutu pa la Reestructuración de les Contornes Mineres, el Principáu y el Montepío pa poner en marcha la Residencia.

Dambos negaron recibir presiones de los máximos órganos del institutu pa modificar informes. Declararon que desconocíen que cuando se dio'l preste al conveniu, yá se taba construyendo en suelu non urbanizable y ensin llicencia d'obres el xeriátricu. El interventor aseguró que'l responsable de comprobar que too tuviera n'orde, yera'l so superior, l'Interventor Delegáu del IRMC, Antonio Merino.

Los conceyales del PSOE y IX investigaos pol Casu Hulla recurren l'autu de la xueza

La defensa de los conceyales investigaos d'Ayer, del Partido Socialista y Izquierda Xunida, recurre la decisión de la xueza d'incorporalos al casu Hulla.

Consideren que dalgunos de los aspeutos que se planteguen nun sedríen una cuestión penal, sinón del ámbitu contencioso-alministrativu; creen que nun tien sentíu que s'instruya con Hulla porque son fechos distintos y conseñen que'l delitu de prevaricación del que se-yos acusa prescribiría.

Ye l'argumentu del lletráu Enrique Ríos que representa a los que, nel momentu en que dexaron gratuitamente la parcela al Montepío, formaben parte del equipu de gobiernu del Conceyu d'Ayer.

Los entós conceyales del Partido Popular, tamién investigaos nesta causa, ente ellos Teresa Mallada, cambiaron de dirección lletrada. Ignacio Álvarez-Buylla va ser l'encargáu de defendelos. Según fontes xudiciales, nun presentaron recursu y el plazu pa facelo, yá acabó.