La biodiversidá, la gran aliada pa la producción de mazana asturiano

Aves y insectos autóctonos combaten les plagues qu’afecten a les colleches

La biodiversidá pue ser la gran aliada pal sector productivu de mazana asturiano. Aves y insectos autóctonos son los grandes aliaos pa combatir les principales plagues qu’afecten cada añu a les colleches. Unos reguladores naturales capaces de sustituyir a los productos químicos.

Plagues como’l cocu la mazana ataquen la semiente del frutu, otres como los pulgones a los brotes en medría o los gorgoyos de la flor qu’ataquen a los capuyos. Son les principales amenaces na producción de mazana asturiano. Una biodiversidá que ye al empar enemiga y aliada.

N’Asturies hai, por exemplu, más de 30 aves insectívores silvestres que pel añu son capaces d’amenorgar considerablemente estes infestaciones. Caltener les sebes naturales, les viesques na contornada de les finques o la instalación de caxes ñeru nes plantaciones puen atrayer a estos voladores tan beneficiosos pa les producciones, capaces de sustituyir a los productos químicos.

Una forma natural de combatir les amenaces na producción d’una de les principales marques d’identidá asturiana.