La costa llanisca ye una de les más llargues d'España

Los bufones, únicos n'Europa, unu de los principales atractivos turísticos

Los 48 kilómetros de la costa llanisca vuélvenlu unu de los conceyos cola costa más estensa d'Asturies y del país. Los sos castros, les sos penínsules, los sos bufones, les sos pontes, les sos dolines y los sos cantiles acuchiellaos protexen los 40 arenales de pequeñu formatu dándo-yos una guapura estraordinaria.

Les de Cobixeru y Gulpiyuri son les más peculiares; les de San Antolín y Torimbia, les más llargues; les de La Güelga o Castiellu, les más xabaces; les de Cuevas o Sorraos, les más pintoresques, les de Llanes, Celoriu y Barru, les más urbanes; la de Po, la más familiar; les de San Antonio y la ría de Niembru les más bucóliques; y la de Samartín la más ideal pa entamar na práctica del surf.

Los bufones son una de les maravíes de la natura qu'ufierta la costa llanisca, únicos n'Europa, lo que los convierte nunu de los principales atractivos turísticos pa fomentar la desestacionalización. Los de Pría, los d'Arenuces, el de Santiuste o'l de Santa Clara son esa especie de chimenees naturales comunicaes cola mar, peles qu'apaecen columnes d'agua pulverizao cuando'l Cantábricu amuesa tol so enfadu.

La costa de Llanes tamién ufierta la posibilidá de ver daqué único, L'Urriellu, el más famosu de los Picos d'Europa. Acolúmbrase dende la sablera llanisca de San Antonio, en Los Picones.