La defensa de Villa recurre l'autu de midíes cautelares de la Operación Hulla

Considera desproporcionáu l'embargu del so patrimoniu

La defensa de Fernández Villa recurrió l'autu de midíes cautelares de la Operación Hulla. Considera que nel autu de la maxistrada namás s'atribúi al ex-sindicalista el tar venceyáu a José Antonio Postigo.

En nengún momentu, al so xuiciu, hai motivos qu'indiquen que Villa pudo tar rellacionáu cola subvención estatal o coles obres del Montepío de la Minería.

Por ello, califica de desproporcionáu l'embargu de toles sos cuentes y bienes. Nel so escritu asegura que'l patrimoniu del ex-líder sindical ye anterior a 2012, cuando regularizó la so situación fiscal, y que, dende esa fecha, nun tuvo nenguna medría patrimonial.

La defensa de Fernández Villa va un pasu más allá y plantega que l'embargu de los sos bienes pue perxudicalu na otra causa que tien abierta, na del SOMA por apropiación indebida.

Ta yá en fase de xuiciu oral y como fianza presentóse'l depósitu bancariu agora embargáu y tamién el vehículu prindáu, un Mitsubishi.

La lletrada Ana García Boto recuerda qu'esi coche compráu en 2006, que nun tien nada que ver cola Operación Hulla, y que la prohibición de disponer d'él torga a Villa usalu pa reparar el dañu na causa abierta por presunta apropiación indebida.

Fernández Villa tien bloquiaes toles sos cuentes, hasta'l puntu, según la so defensa, de que nun puede sacar del bancu nin 10 euros.

Amás, denuncia, el bloquéu torga que reciba los ingresos procedentes de la Seguridá Social, de la so pensión por incapacidá. Tampoco pue facer frente, asegura, a los gastos corrientes que tien domiciliaos.

Nun nuevu escritu, la lletrada reclama que s'igüe esta situación porque se tán produciendo impagos de servicios esenciales, como la lluz, l'agua o'l teléfonu.

Impagos que lu lleven, asegura, a él y a la so familia a la llende de la supervivencia. Con fecha 25 de mayu, los dos cuentes que figuren a nome de Villa teníen un saldu total de 181.000 euros.