La despoblación del mediu rural, un problema d'Estáu

Xornada sobro despoblación en Villaviciosa

La despoblación del mediu rural ye un problema d'Estáu, que fai medrar tamién otros problemes como les quemes forestales. Ye una de les conclusiones de la xornada que güei se celebra en Villaviciosa sobro despoblación. Un eventu qu'entamen, conxuntamente, Principáu, Reader y Foro Acción Rural.

Más del 80% del territoriu español ye rural, y sicasí, nesta inmensa superficie, namás vive'l 16% de la población. Un problema que va a más cada añu, y pal que se necesiten soluciones darréu. Un problema que xenera, a xuiciu de los espertos, y ente otres munches coses, que les quemes seyan cada vez mayores y más difíciles de controlar.

La Conseyera de Desarrollu Rural, María Jesús Álvarez, matiza, sicasí, que los primeros responsables del fueu son los que prenden la mecha.

Na xornada que güei se celebra nel Teatru Riera de Villaviciosa búscase salida pa los cuasi 400.000 kilómetros cuadraos de superficie rural d'España. Una opción p'afitar población son les nueves tecnoloxíes.

Otres propuestes pasen por arrexuntar conceyos y servicios, sofitar la integración de moces y muyeres nel mediu rural o adoptar midíes fiscales y financieres específiques pa les zones que sufren despoblación.