La familia de Fernández Villa pide la so incapacidá civil

La Fiscalía va analizar el casu

La Fiscalía d'Asturies estudia la solicitú d'incapacidá civil del ex-secretariu xeneral del SOMA-UXT José Ángel Fernández Villa, oxetu d'una querella presentada pol sindicatu y investigáu pola Fiscalía Anticorrupción en rellación al orixe de 1,4 millones que regularizó na amnistía fiscal.

Nos prolegómenos d'una mesa redonda sobre la reforma de la Llei d'Enxuiciamientu Criminal, la Fiscal Cimera d'Asturies, Esther Fernández, dixo que pal estudiu de les mesmes nomóse a un Fiscal Instructor.

Amestó que les dilixencies preprocesales puen acabar con archivu, o cola presentación de la correspondiente demanda de cambéu de la capacidá.

La Fiscalía del Principáu informa qu'incoó'l pasáu día 21 d'esti mes unes dilixencies preprocesales sobre discapacidá, por si de les mesmes pudiera vese que l'ex-líder sindical mineru "pudiera tar afectáu por dalgún tipu de causa de cambéu de la so capacidá".

El SOMA-UXT interpunxo una querella contra Fernández Villa na que-y pide volver 360.000 euros, ampliaos dempués hasta 420.000 por gastos ensin xustificar y apropiación de dietes.

Dientro de la mesma querella'l SOMA-UXT reclama la devolución de más de 70.000 euros al ex-secretariu de la Fundación pa la Formación, la Investigación, la Documentación y los Estudios Sociales (Infide), Pedro Castillejo.

El pasáu mes de febreru l'Audiencia Provincial refugó los recursos presentaos pola defensa de Fernández Villa escontra la decisión del xulgáu qu'instrúi la causa abierta pola querella presentada escontra él pola organización sindical de citalu a declarar como investigáu.

Nos dos autos, la Sección Tercera de l'Audiencia tornó los recursos d'apelación escontra la so citación a declarar alusivos a la supuesta enfermedá mental que sufre'l procesáu y al refugu del xulgáu a la designación d'un peritu neurólogu nomáu pola defensa de Fernández Villa.