La familia del bomberu Eloy Palacio va pidir la reapertura del casu

Cúmplese un añu de la quema

La familia d'Eloy Palacio, bomberu muertu va un añu na quema de la cai Uría, va pidir la reapertura del casu en conociéndose esta selmana'l nuevu informe de la policía científica sobre l'accidente socedíu na capital asturiana.

L'abogáu de la familia del fináu, Francisco Pérez Platas, espresó a los periodistes, al rematar l'actu d'homenaxe a Palacio, la so sorpresa pol conteníu "tan refechu y detalláu" del informe, y porque nun esperaba que fuera conocíu una vegada archiváu'l casu.

Una vegada conocíu'l conteníu del informe policial, el lletráu tien previsto pidir formalmente'l próximu llunes la reapertura del casu.

L'informe apurríu pola policía científica conclúi qu'hebo delles neglixencies no referente al suministru del agua, que condicionaron los llabores d'estinción, y tamién na supervisión y dirección del operativu.

Pérez Plates tamién criticó la celeridad cola que s'archivó'l casu nel so momentu, y los informes previos al apaecíu esta selmana.

Estes declaraciones surden tres l'homenaxe que se-y fixo güei a Eloy Palacio enfrente del edificiu númberu 58 de la cai Uría, nel primer aniversariu del so fallecimientu, y al que tamién asistieron l'alcalde d'Uviéu, Wenceslao López, y el conseyeru de Presidencia y Participación Ciudadana, Guillermo Martínez, amás de políticos de distintos partíos.

Nengún de los presentes quixo facer declaraciones sobre esti informe policial, yá que desconocíen el conteníu de les mesmes, y manifestaron que la poca información que tienen sobre él llegó-yos al traviés de los medios de comunicación.