La fuelga de supermercaos sigue alantre énte la falta d'alcuerdu

Prevista una asamblea'l próximu domingu

Los sindicatos caltienen pel momentu la convocatoria d'ocho díes de fuelga nos supermercaos pa les próximes navidaes énte la falta d'alcuerdu cola patronal sobre la negociación del conveniu colectivu, qu'afecta a unos 12.000 trabayadores.

La xunta celebrada güei nel Serviciu Asturianu de Solución Estraxudicial de Conflictos (SASEC) remató ensin alcuerdu no que cinca a delles cuestiones llaborales, a pesar de que los sindicatos sí dan por bona la xuba salarial propuesta pola patronal, esplicó la representante d'UXT nel Comité de Fuelga Marta González.

Esta xuba salarial sedría del 1,8% pa esti añu, del 2% pa 2020 y del 2,38% pa 2021, pa unos trabayadores con un salariu mediu asitiáu en 820 euros, con una xornada añal de 1.820 hores de llunes a sábadu.