La fuelga de tresportes vacia'l Mercáu Nacional de Ganáu de Siero

El conseyeru Alejandro Calvo llama a la responsabilidá

El Mercáu Nacional de Ganáu de La Pola (Siero) nun tien nin un xatu na xornada d'esti xueves, cuando taba prevista pa los xatos de recría. Ye una de les consecuencies de la fuelga de tresporte de mercancíes, que cumple güei la so cuarta xornada.

Lo avezao en mercáu de los xueves ye que lleguen al recintu unes 1.000 reses aproximadamente y nun llegó nenguna. El 80% del ganáu que llega al mercáu de La Pola (Siero) vien d'Asturies y el 20% restante de les comunidaes vecines, Cantabria y Galicia. El 97% de lo que se vende va pa fuera.

José Luis Díaz Álvarez, director del Mercáu Nacional de Ganáu de La Pola (Siero), alerta de que la consecuencia de que los animales queden nes cortes, ye que cuando se reabran les canales de comercialización haya una ufierta escesiva y una baxada de precios.

El llunes la presencia d'animales foi tamién testimonial, ye una de les consecuencies de la fuelga de tresportes.

El conseyeru de Mediu Rural y Cohesión Territorial, Alejandro Calvo, llamó a la responsabilidá pa garantizar la cadena alimentaria y confió en que'l Ministeriu de Tresportes atienda a la situación de la medría del preciu del carburante cola mayor axilidá.