La ilesia de San Xuan de Duz ye l'únicu templu asturianu con forma d'horru

Foi construyida nel pueblu colungués de Duz gracies a la donación de la familia Montoto Hernández

La ilesia de San Xuan Bautista de la parroquia colunguesa de Duz, ye una de les más particulares de tol territoriu asturianu. Diferénciase de toles demás porque la so principal característica arquitectónica ye que’l campanariu y el cabildru tienen la mesma estructura que la d’un horru y les sos columnes tán construyíes en forma de pegoyos señala Jesús Sanz, arzobispu d’Uviéu.

Ye un templu modernista, construyíu a entamos de la década de los años 20 del sieglu pasáu y inauguráu en 1924, gracies a la donaciones de la familia Montoto Hernández, una de les más influyentes del conceyu colungués apunta José Antonio Fidalgo, cronista oficial de Colunga.

Les sos cuatro vidrieres son otru de los elementos más destacaos d’esta ilesia parroquial de los pueblos colungueses de San Xuan de Duz, Güerres y La Poladura. Les de la izquierda tán dedicaes al matrimoniu benefactor y les de la derecha al fíu, resultáu del primer matrimoniu del donante d’estos bienes.

El templu fue parcialmente destruyíu na Guerra Civil Española, quedando afectada la escultura en piedra de San Xuan Bautista y les imáxenes de piedra de los dos ánxeles orantes.

Precisamente, los feligreses de la parroquia colunguesa de Duz celebraron el primer centenariu de la ilesia de San Xuan Bautista a finales del pasáu mes de xunu con una fiesta espiritual, lúdica, histórica y cultural.