La imaxe de la Virgen de Pastur ye venerada por miles de devotos

María Amparo Martínez y el so home son únicos habitantes de Pastur

Cada 28 d’agostu y 8 de setiembre, miles de devotos veneren a Nuestra Señora de la Soledá, popularmente conocida como la Virxe de Pastur, nel conceyu d’Eilao​. Nin lo incómodo del so asitiamientu, nuna cañada fondera na sierra de La Bobia, echa p’atrás a los fieles atrayíos pola so fama de milagrosa.

María Amparo Martínez y el so home son únicos habitantes de Pastur y son los encargaos, dende va 51 años, de guardar la llave d’entrada al Santuariu, construyíu en 1665.

Hasta equí lleguen andando de llugares tan lloñe como A Veiga, a más de 30 kilómetros monte abaxo. Consideráu como uno de los principales centros de pelegrinación del occidente, los fieles ponen veles a los pies de la imaxe pidiendo poles sos necesidades. Inclusive, cuenta la lleenda, que les madres ufiertaben a la virxe polos sos fíos llorones.

Una devoción que tuvo a piques d’acabar col edificiu la nueche del 8 al 9 de setiembre de 2005. Too paez indicar que les miles de veles y cirios prendíes polos pelegrinos incendiaron el suelu de madera arrasando la ilesia. Tamién quedó muy dañada la talla de la virxe.

Al so llau, y símbolu d’un tiempu entá anterior, hai un vieyu texu con polo menos cinco sieglos de vida. Les sos dimensiones, más de cuatro metros de perímetru y 18 d’altura, faen d’él y de la so fiel compañera’l llugar ideal pa siguir convocando a la fe, nun privilexáu llugar que nada nin naide podrán nunca romper.