La incertidume económica cute a les bolses y Arcelor pierde un 6%

Última fornada de coque de les bateríes d'Avilés

La situación d'incertidume de les empreses amuésase nos mercaos. El mieu a una crisis global funde les bolses, ente elles la española, que rexistró la mayor cayida de los dos últimos años.

Arcelor lideró ayeri eses cayíes con unes perdes de cuasi'l 6%, nun momentu difícil, onde la compañía faló d'emerxencia total.

La última fornada de coque que salió de les bateríes d'Avilés foi la tarde del llunes. Despúes de 63 años en funcionamientu, les bateríes tán yá apagaes.

Agora entamó'l procesu de desmantelamientu de les instalaciones pa reutilizar el terrén que lliberen.

L'acería d'Avilés va nutrise nun futuru del coque de les bateríes de Xixón.

Tocante a la situación de les bolses, l'Ibex35 cayó un 2,8%, el mayor descensu de los dos últimos años y perdió los 9.000 puntos.

Con esti escenariu, el Gobiernu d'Estaos Xuníos anunció que'l 18 d'ochobre va entamar a imponer aranceles a productos de la Xunión Europea, con mayor pesu a cuatro países, ente ellos España. Va facese dempués de que la Organización Mundial del Comerciu diéra-y la razón nuna llarga disputa comercial.

Pel momentu, van imponer aranceles del 10% a les aeronaves civiles grandes que'l bloque comuñal vende a EEXX y del 25% a ciertos productos agrícoles. Los países que van sentir el mayor "pesu" de los gravámenes van ser Francia, Alemaña, España y el Reinu Xuníu.

Ente los productos que se van ver afectaos ta'l quesu fresco, les aceitunes, l'aceite d'oliva y productos porcinos d'orixe español, alemán y británicu; y el vinu francés. Tamién se van ver afectaos los yogures, la mantega, les cereces y los piescos de la mayoría de los países de la XE.

Bruxeles yá anunció que va tomar midíes asemeyaes.