La mar ye una constante na obra de José Marcelino García Fernández-Luanco

Ganó'l premiu de novela Dolores Medio en 2013 por 'El Café de la Marina'

La vida de José Marcelino García Fernández-Luanco siempres foi ente llibros. Fíu, nietu y bisnietu de marineros, la mar cuerre peles sos venes y nes sos obres lliteraries. Home polifacéticu, estudió ATS en Madrid y acabó trabayando nel Hospital de Xove y n’Aceralia.

Siempres compaxinó’l so trabayu cola so pasión pola lliteratura y en nueches de guardia nacieron les sos meyores obres. Quiciabes tolo que vio atendiendo a pacientes foi lo que lu llevó a estudiar Teoloxía, espiritualidá que se ve tamién na so lliteratura.

La so afición a afitar pensamientos y sentimientos tornóse n’obres como 'Domingos por el rastro de Gijón', 'El humo de los barcos' o’l poemariu 'Mar en Alborada'. La so obra 'El Café de la Marina' ganó’l premiu Dolores Medio de Novela en 2013. Nella la mar y Candás tán mui presentes, asina como los golores y colores de la so neñez.

TPA Noticies despídese de José Marcelino como entama la so novela, con un boleru que lu envuelve too y retrata bien un día cualquiera nel so Candás nel que 'Llovía en la costa'.