La muyer de Pedro Nieva nun cree que seya'l responsable del crime d'Ardines

Niega que l'home la controlare, fuere celosu y tuviere desesperáu

La muyer del presuntu inductor del asesinatu del conceyal d’IX de Llanes Javier Ardines dixo esti llunes que nun cree que l’home seya’l responsable del crime y negó qu’él sintiere odiu a la víctima dempués de descubrir qu’ella y l’edil teníen una rellación secreta.

La muyer del presuntu inductor declaró como testigu, al traviés de videoconferencia dende Bilbao, na octava sesión del xuiciu con xuráu que se desendolca na Audiencia d’Uviéu pol asesinatu d’Ardines, nel que tán acusaos Pedro N. A. como supuestu inductor, así como dos presuntos sicarios y un intermediariu.

Dempués d’almitir que tenía una rellación col conceyal dende va cuatro años, dende que’l so matrimoniu entamare a dir mal, la muyer de Pedro N. A., al empar prima segunda de la muyer d’Ardines, defendió que l’home tampoco yera una persona agresiva o controladora.

La muyer dixo que dempués de conocer la muerte d’Ardines, el 16 d’agostu de 2018, entró en "shock" y nun sabía "nin qué pensar".