La plantiya d'Alcoa lleva a la cai'l fondu clamor escontra'l zarru

El Gobiernu central y los d'Asturies y Galicia entamen acciones pa revertir los zarros

Cerca de 4.000 persones, según la Policía Local, concentráronse güei na ciudá d'A Coruña pa participar nuna masiva protesta pola decisión de la multinacional estadounidense Alcoa de zarrar les sos fábriques d'aluminiu n'Avilés (Asturies) y A Coruña.

La marcha salío de la Plaza de La Palloza y tuvo'l so términu na sede de la Delegación del Gobiernu en Galicia y, la mesma, tuvo secundada por distintos representantes del ámbitu políticu, económicu, social y sindical, amás de pola ciudadanía en xeneral.

La protesta salió con un poco de retrasu sobre la hora prevista, afitada a les once la mañana, y fízose so los lemes "Alcoa nun se cierra" y "Estabilidá enerxética y futuru pa la industria".

Trescurrió encabezada por miembros del comité d'empresa, que llevaben camisetes naranxes cola lleenda "Non al zarru", y hebo total normalidá, ensin incidentes.

A los representantes de los trabayadores siguíenlos los líderes de los distintos partíos políticos que quixeron dar una amuesa d'unidá nesta acción reivindicativa.

Tres ellos, los emplegaos y parientes d'emplegaos de la empresa y, a lo último, particulares anónimos que quixeron tar sofitando nestos duros momentos.

"Alcoa, escucha, A Coruña ta en llucha", "Nun tenemos mieu, somos gallegos" o "Alcoa culpable, vémonos na cai" fueron delles de les conseñes que se cantaron nesta importante reivindicación na cai.

Les movilizaciones, nes sos distintes modalidaes, van siguir la selmana que vien y van caltenese hasta qu'haya una solución pa los cientos de trabayadores d'Alcoa.

Protesta ciudadana n'Avilés escontra'l zarru d'Alcoa

Una ventena de vecinos d'Avilés concentráronse na plaza d'España escontra'l zarru d'Alcoa. Una pequeña movilización porque, según desplicaron, la mayoría d'afectaos y simpatizantes optaron por manifestase güei n'A Coruña.

Los presentes nesti actu de protesta pidieron que se pare l'ERE d'estinción y un frente políticu rexonal y estatal escontra'l zarru. Esperen que tres la xunta prevista pal martes ente'l Ministeriu d'Industria y la dirección de la empresa salga dalguna alternativa al zarru.