La sentencia del casu Renedo va lleese n'audiencia pública'l 12 de setiembre

Atiende al pidimientu del Ministeriu Fiscal pola so relevancia pública

Los fechos probaos de la sentencia del casu Renedo y un estractu de los sos fundamentos van ser daos a conocer por llectura n'audiencia pública'l próximu martes, 12 de setiembre, según alcordó güei la sección tercera de l'Audiencia Provincial d'Uviéu.

Primeramente, l'Audiencia alcordara dar a conocer mañana, 7 de setiembre, el testu íntegru del resolvimientu xudicial por aciu de notificación per escritu a toles partes.

Sicasí, énte "l'interés social" qu'espertó esta sentencia, el Tribunal alcordó tener en cuenta'l pidimientu del Ministeriu Fiscal pa que'l conteníu de la mesma se diera a conocer n'audiencia pública.

Tres la so llectura, la sentencia va ser notificada a toles partes, acusaos y perxudicaos, que fueron citaos pol Tribunal a la llectura de la sentencia.

La llectura va llevase alantre na sala de vistes númberu 1 de l'Audiencia Provincial, a partir de les 9:30 hores, sacante que se presente y siga alantre dalgún recursu de súplica que les partes puen presentar escontra d'esta dilixencia nel plazu de tres díes a partir de güei.

El tribunal fixo públicu'l pasáu vienres, 1 de setiembre, la parte dispositiva de la sentencia na que conderga al ex-conseyeru d'Educación del Gobiernu asturianu José Luis Iglesias Riopedre y a la so númberu dos nel departamentu, María Jesús Otero, a 6 y 9 años y mediu de prisión, respectivamente.

La sentencia tamién conderga a la funcionaria Marta Renedo Avilés (les sos iniciales formen el acrónimu que da nome al casu) a 9 años de prisión pola so participación na trama d'axudicación irregular de contratos a delles empreses.

Pela so parte, los cuatro empresarios xulgaos -Víctor Manuel Muñiz, d'Igrafo; Alfonso Carlos Sánchez, d'Almacenes Pumarín; Maximino Fernández, d'Asac Comunicaciones, y José Azorín, de Nora Proyectos y Ingeniería- fueron condergaos a un total de 15,9 años de prisión.