La singularidá de La Quinta del Ynfanzón

Arquitectura, recursos naturales, elementos d'interés y muncha historia

Una monumental entrada de 100 metros de llargu que se cuela ente los praos pelos que sigue pastiando, non una yeguada tan grande como antaño, pero sí dalgún qu’otru exemplar, da entrada a una finca que tuvo'l so primer dueñu nel sieglu XV y que dende mediaos del XVIII ye residencia de los Vereterra pente medies de Don Miguel de Infanzón, párrocu de Deva.

Hubo que remocicala, recuperala del pasu’l tiempu y de dellos incendios, les guerres carlistes... en 1852, llegó la lluz y l’agua potable y amplióse la casona asturiana primitiva.

La singularidá de La Quinta del Ynfanzón nun ye tanto la so arquitectura, los sos recursos naturales o elementos d’interés, sinón les antigüedaes y les sos histories calteníes poles xeneraciones de títulos y abolengos de los qu’ellí vivieron y siguen faciéndolo.

Ente los antepasaos más llonxanos, un militar de los Reis Católicos y ente les pieces de colección más antigües, una llitera de dos caballos.

Centenarios, inclusive milenarios, son tamién munchos de los elementos del so xardín con frutales plantaos y esplotaos daquella pol empresariu xixonés Tomás Zarracina.

Un total de 10 hectárees de tarrén que por tener tien hasta una pantasma, la de Doña Ana Solís que, por deslleal, tuvo años emparedada equí.

La Quinta del Ynfanzón ye la única de les grandes posesiones asemeyaes que se caltienen en Xixón con bona parte del so dominiu abiertu al esfrute del públicu dende que, en 2002, adaptárase pa ser hotel y restaurán y caltener con ello’l patrimoniu familiar.