La sustituta d’Ardines garantiza que caltendrá la so llinia de trabayu

La investigación sobre la muerte del conceyal "ta avanzando"

La nueva conceyala d’IX nel Ayuntamientu de Llanes, Priscila Alonso, que sustitúi na corporación a Javier Ardines, garantizó güei dempués de tomar posesión del so cargu que caltendrá la llinia de trabayu del edil asesináu’l 16 d’agostu pasáu na contornada de so casa.

Alonso, visiblemente emocionada, señaló nel plenu nel que tomó posesión de la conceyalía que caltendrá "ensin mieu" la llinia marcada pol so antecesor, que formaba parte d’un gobiernu cuatripartitu xunto a PP, Foro y Vecinos por Llanes nel que s’ocupaba de les fasteres de Playes, Mediu Rural y Personal

Asina, la nueva edil garantizó que siguirá l’actuación entamada por Ardines pa garantizar la igualdá d’oportunidaes nel accesu a la plantiya municipal "respetando los principios de publicidá, méritu, capacidá o concurrencia".

Alonso amestó amás qu’otra de les sos llinies de trabayu sedrá promover una ordenación urbanística pal pueblu más turísticu d’Asturies diseñada "a la midida de los intereses de la ciudadanía llanisca y non d’intereses particulares".

A la sesión plenaria asistió’l coordinador xeneral d’IX d’Asturies, Ramon Argüelles, que reclamó la máxima dilixencia pa poder esclariar les circunstancies del crime "pa dar rempuestes a la so familia, collacios y compañeros" y pa poner frenu a la deriva d’amenaces rexistraes dempués del asesinatu a cargos d’Izquierda Xunida y d’otros partíos en dellos ayuntamientos.

La investigación sobre la muerte del conceyal de Llanes "ta avanzando"

La delegada del Gobiernu n’Asturies, Delia Losa, aseguró güei que la investigación pa esclariar l’asesinatu del únicu conceyal d’Izquierda Xunida nel Ayuntamientu de Llanes, Javier Ardines, ta "avanzando".

En rueda de prensa, Losa esplicó que confía en qu’en pocu tiempu habrá "dalgún resultáu" porque nun hai "razón" dalguna pa pensar que la investigación del crime, del 16 d’agostu pasáu, tea estancada.

La delegada del Gobiernu refugó comentar más detalles sobre la marcha de la investigación pa nun entorpecer la investigación que tán llevando alantre los integrantes de la Unidá Central Operativa (UCO) de la Guardia Civil como refuerzu al trabayu de los equipos de Policía Xudicial de Llanes y Xixón.

El Xulgáu de Primer Instancia y Instrucción de Llanes prorrogó a entamos d’esti mes y n’otros trenta díes el secretu del sumariu pol asesinatu del conceyal Ardines pa facilitar les investigaciones que tán llevando alantre la Guardia Civil.
Sus vecinos de Coruxona señalan que no es la primera vez que se producen accidentes en este punto y aseguran que el firme no está nivelado.