La xueza del casu Hulla nun baraxa treslladar, darréu, la causa al TCXA

Teresa Mallada pasará’l día 24 de xunu a ser aforada

Según pudo saber TPA Noticies, la xueza del casu Hulla nun baraxa treslladar, darréu, a la Sala Civil y Penal del TCXA la parte del casu Hulla pola que sigue investigada Teresa Mallada y el restu de la corporación d’Ayer ente 2008 y 2010.

La diputada electa del PP, que recoyó’l so acta’l llunes, pasará’l día 24 de xunu a ser aforada, lo que supón que la xueza qu’instrúi’l casu Hulla nun pue toma-y declaración nin nenguna decisión qu’afecte a los sos derechos fundamentales; pero sí pue siguir coles dilixencies y los trámites que considere afayadizos pa esclariar los fechos.

Según fontes xudiciales la maxistrada nun baraxa treslladar, darréu, la causa al TCXA, que ye la competente pa los aforamientos asturianos. De facelo, nun futuru, lo más previsible ye que namái se tresllade la parte qu’afecta a la cesión de baldre de los terrenos pa construyir el xeriátricu de Felechosa.

Tola corporación d’Ayer, ente 2008 y 2010, tamién Teresa Mallada, ta siendo investigada por esa decisión aprobada nun plenu municipal.