La xueza imputa por homicidiu al autor de la patada a David Carragal

Los dos mozos van tener que responder pola so responsabilidá nun delitu d'omisión del deber

La xueza alcordó la imputación del mozu de 19 años que solmenó una patada que-y costó la vida al profesor pixuetu David Carragal, de 33 años, como presuntu autor d'un delitu d'homicidiu, mientres que los dos mozos que lu acompañaben van tener que responder pola so responsabilidá nun delitu d'omisión del deber de socorru.

La xueza d'instrucción númberu 4 d'Uviéu emitió un autu pol que declara la competencia del Tribunal del Xuráu p'asumir la causa y alcuerda la imputación de J.C.C. como presuntu autor d'un delitu d'homicidiu.

Los otros dos mozos que lu acompañaben el día de l'agresión, R.B.D. y A.S.S. van ser xulgaos namás por nun ayudar a la víctima, mientres que se sobresee provisionalmente la causa escontra dambos pol delitu d'homicidiu.

L'agresión tuvo llugar na madrugada del 11 de xunu del pasáu añu nes fiestes del barriu uvieín de La Florida.