La xueza ve indicios de connivencia ente Postigo, el constructor y l'arquitectu

Pide embargar les sos cuentes y propiedaes, asina como les de Villa y familiares

La maxistrada Begoña Fernández señala qu'hai nicios abondos de criminalidá escontra Fenández Villa y los sos familiares directos por blanquéu de capital. Igual qu'escontra José Antonio Postigo, el so entornu familiar directu y la so actual pareya.

Asina se conseña nel autu, al que tuvo accesu TPA, y nel que la maxistrada considera que dambos sindicalistes tendríen, xunto col asesor, l'arquitectu y el contratista, una participación cimera nes distintes fases del proyectu p'axudicar y construyir la Residencia del Montepío.

La maxistrada subraya que l'asesor fiscal y l'arquitectu fueron parte de la mesa qu'envaloró les ufiertes p'axudicar el proyectu a Alcedo de los Caballeros. Una empresa con un alministrador, conseña, que yá venía venceyáu y tenía intereses económicos compartíos col arquitectu y col Montepío.
La xueza considera qu'actuaron con connivencia y que la so intervención nel proyectu apaez venceyada al incrementu nun 51% de la obra subvencionada. Un incrementu que, según el péritu de Facienda, nun tenía xustificación.

Por too ello, la maxistrada xustifica l'embargu de toles sos cuentes, inmuebles, propiedaes y vehículos.

Informe forense de Villa

Per otru llau, l'informe que los médicos forenses ficieron a José Angel Fernández Villa'l pasáu xueves, pa decidir si podía declarar, dexó claro que'l so estáu de salún nun empeorara y nun yera una torga pa contestar a les entrugues de la maxistrada.

Según pudo saber TPA, nes conclusiones, conséñase que'l grau de deterioru del ex-líder minero nun sedría un pilancu pa ser oyíu nuna declaración o manifestar la so voluntá.

Eso sí, dizse que nes declaraciones ye necesario usar un llinguaxe claru y cenciellu, repitiendo les entrugues cuando seya necesario y permitiendo un tiempu pa que respuenda. Tamién son necesarios los recesos que-y permitan descansos afayadizos al so estáu físicu.

Concluyen los forenses que se ve un siguimientu médicu continuu de Villa, dalgo que repercutió de manera positiva na so evolución.

La esploración al que fuera secretariu xeneral del SOMA fízose na sede xudicial. Villa presenta, según médicos, ciertu grau de somnolencia, anque conserva la so capacidá de responder a los que-y entruguen, faciéndolo de manera lenta, hasta con bloqueos ocasionales.

En cuanto a la so memoria, son los recuerdos recientes los que tien llendaos. Sicasí, conserva muncho meyor los acontecimientos de la so vida pasada, como los trabayos que fizo, el nome de la empresa o'l cargu sindical qu'exerció.

Tres l'informe, los forenses consideraron que podía contestar a les entrugues de la xueza, pero nun lo fizo, acoyéndose al so derechu a nun declarar.