Les grandes empreses instalaes n'Asturies tán faciendo los sos deberes pa lluchar escontra'l cambéu climáticu

Les compañíes consideren qu'abre oportunidaes de negociu, pero reclamen ayudes

Les grandes empreses allugaes n'Asturies incorporen dende va años a les sos estratexes criterios de sostenibilidá y de cuidáu del mediu ambiente. Consideren que la llucha escontra'l cambéu climáticu abre oportunidaes de negociu, pero reclamen ayudes.

Asina lo espunxeron nun alderique que se fizo n'Avilés, entamáu pol gobiernu del Principáu, sol lema 'Tiempu d'Actuar'.

Les estratexes de les grandes empreses allugaes n'Asturies pasen por desaniciar les emisiones de carbonu en 2050. Llogralo, espliquen, supón un cambéu nos sos procesos y reclamen sofitu.

N'Arcelor Mittal, por casu, investiguen pa fabricar arrabiu de manera distinta. En Saint Gobain, una de les premises ye la busca de nueves oportunidaes de negociu na llucha escontra'l cambéu climáticu.

Du Pont, pela so parte, enfótase en fabricar productos menos contaminantes con procesos que traigan menor gastu enerxéticu; mientres qu'EDP márcase como oxetivu amenorgar les sos emisiones un 90% en 2030. Esi añu, el 90% de la so xeneración d'enerxía va ser al traviés del vientu y del sol.

Alsa ta camudando la so flota hacia autobuses menos contaminantes. Quier ser l'alternativa al coche.

N'Asturiana de Cinc, el problema nun son les emisiones, sinón el consumu d'enerxía. Según el so director, Jaime Martín, ye la responsable de más del 20% del consumu eléctricu total d'Asturies. N'España, el so consumu supón cuasi un 1% del total.