Les mines d'espato flúor tresformaron Caravia a principios del sieglu pasáu

La economía pivota ente'l Polígonu de Carrales y les sableres de Morís y La Espasa

Hai constancia de poblamientu en Caravia dende'l Paleolíticu.

D'un periodu posterior, como ye la Edá del Fierro, son el castru y una de les reliquies más relevantes del periodu castreñu asturianu: la Estela de Duesos. Esta porción de piedra caliar de cuasi metru y mediu d'altor foi alcontrada por Jenaro de la Fuente nos años 80, al pie de la Ilesia de Caravia Baxa, y tien unos 2.000 años d'antigüedá.

El territoriu de Caravia perteneció sieglos al Obispáu d'Uviéu, hasta que los vecinos consiguieron pasar a depender directamente de la corona. Socedió a finales del sieglu XVI, en plenu rellumu del Imperiu Español, que gobernaba entós Felipe II.

Caravia ye'l tercer conceyu asturianu más pequeñu, lo que fizo qu'en dellos momentos a lo llargo la hestoria plantegara xunir les sos tierres al vecín conceyu de Colunga. Fueron, de nuevo, los sos  vecinos, los que s'encargaron de caltener la independencia del conceyu.

Sicasí, el tresformamientu más drásticu de Caravia entá nun llegó hasta entamos del sieglu XX. Esti hasta entós pacetible territoriu agrícola y ganaderu multiplica la so población cola llegada del espato flúor, qu'entama a sacase en cinco mines que, lliteralmente, percuerren el sosuelu'l conceyu. El mineral, vital na fabricación del aceru, la industria química o la construcción, tresforma dafechu'l paisaxe, la economía, la sociedá y l'ambiente de Caravia.

A principios de los 80 empieza la mengua del sector. Per un llau, nes mines empieza a faltar el mineral. Per otru, el 17 de marzu de 1.982 la traxedia cébase col conceyu: cinco mineros finen en Foncaravia en derrumbándose una galería.

La combinación de dambos factores lleva al zarru d'esta esplotación malapenes unos meses dempués, a la que siguiríen el restu de mines del conceyu n'años posteriores. La postrera en cerrar foi Mina Jaimina, fai agora cinco años.

Dende entós, Caravia pivotó sobro dos exes: el Polígonu Industrial de Carrales, nel que s'ocuparon toles parceles; y los recursos turísticos, ente los que destaquen les sableres de Morís y La Espasa.